سارحل - تدوينة خاصة جدا

سارحل

واترك لكم ولى امل بالعودة

ساترك لكم بعض اشيائى الذى كنا قد تقسمناها سويا

ساترك لكم لوحة ولعبه وكوب وحلماُ

ساترك معكم اعواماً وحبا

سارحل ومعى شوقاً ودمعة

فعذرا
لايام وسنوات قضيناها سوياُ

لاحلام عشناها معا ُ

سارحل لكى تستمر الحياة

.................................

ميشو : سامحنى عشت معاك ايام حلوة قوى

منعم : هتوحشنى (طلبة )

أيمى : بحبك وغصب عنى واللة

هوبى : انتى بجد هتفرقى معابا قوى

ابو احمد : هفتقدك بجد

كيمو : من غير كلام ( انت عارف)

...................................................

سمسم

اكنوبر 2009

تمرد

لن يكفيتى من حبك نظرة

لن يكفينى من وجودك قبله

لن يكفينى من قلبك نصفه

اريد حبك كاملا

اريد شوقا مميت

اريد قلبك لى وحدى

فاذا اردت الرحيل ارحل

ولكن رد لى سنين عمرى اولا قبل ان ترحل

رد لى حبى كاملا ولا ترحل به

رد لى سهرى وقلقى وشوقى

فان لن تكن لى فارحل واترك اشيائى فانها ملكى

فان اردتها فلن تكون لك الا بشروطى

رسالت زوجة

سجدة شكر واحدة لا تكفي ان كنت اريد بة شكر الله على وجودك معى

فمن اجلك أريد ان أشكر الله الاف المرات واحمدة باقى العمر

ففى عينيك تجمعت كل معانى الحب

وبين شفتيك تعلمت كيف اكون انثى

تعلمت كيف تكون هويتى انت وحياتى انت

وكيف اهب عمرى اليك

كيف تتحول السنين والشهور والايام الى الالوان ترقص معى حين تاتى

كيف يتحول العمر الى رسائل حب

كيف تكون الثورة من قلب الرجاء

كيف يكون اعترافى بحبك هو اصدق ما قلت وعشت ورويت

كيف تبدا الايام بك وتنتهى عندك

فطالما كتبت عن الحب وتمنيته ورويته ولم اجده الا حين

احسست بجسدى بين ذراعيك

يارب لك منى الف شكر وكل الحمد ومنتهى الاخلاص فى شكرك وحمدك

على اعطائى زوج بكل هذا الحب

احبك احبك احبك

زوجتك

سمسم

2009

رسائل قصيره

ساقول احبك لكل شى ساخبر بها الارض والسماء ساضعها مع بذور الاشجار لتتنقلها نسمات الهواء
ساطعمها للطير ليقذف بها بين الامواج
لتاتى اليك من كل مكان تخبرك حبى واشتياقى يا مالك قلبى وروحى فى كل مكان وزمان


بحبك قد حب كل الناس لبعض ففى وجودك حياتى وفى رحيلك فنائى

احبك حتى اخر قطرة فى دمى

عشقتك كما لا تعشق أمراه فلا تتركنى مهما كان الامر

عندما احببتك جعلتنى اسعد نساء الارض وعندما تغيب اصبح اتعس مخلوقات الارض

تقتلنى الغربه كلما رحلت عن جوارك فقد أصبح حضنك وطنى الابدى

وحشتنى احبك احبك احبك

فى حبك انا أميرة مالك الكون

م. - مغرمه بحبك حتى اخر العمر
ر- روحى معك اين ما تكون
و- وحشنى دائما حتى وانا معاك
ا- اعشق كل شى فيك
ن - نور حياتى انت

سمسم२००८

ثورة ورجاء

من يوم ما عرفتك ما جبتش كتاب جديد

من يوم ما عرفتك ما رسمتش لوحه جديده

من يوم ما عرفتك ماكتبتش حاجه احبها

يبدو انى اصبت بحاله من الختان الفكرى

واختزلت نفسى وفكرى فى بقع دماء حمراءعلى قماش ابيض ليله الزفاف

وبعض من ملابس النوم المثيرة فى ما بعد لاصبح متعتك بعد يوم شاق

أصيب فكرى بحاله من غزو

المفروشات المزخرفه والاوانى الملونه والستائر الحريريه

والحوائط المرسومه بكل الالوان

اصبح فكرى هو انت ويومى هو انت حتى جسدى سيصبح لك

فرجاء

اقترب من اكثر حتى لا اهرب منك الى عالمى الملون مرة اخرى

وان كان عالمك اكثر الوان

سمسم

2008

راجع بوست اكرة انوثتى

كل سنه وانتم طيبين

كل سنه وكل الناس طيبين

وكل اللى بيحبه بعض طيبين

اتنظرونى قريبا

عيد سعيد

عندما احببتك

عندما احببتك
الفيت بكل ذكرياتى و اوراقى ..محوت تاريخى وهويتى
وبدات معك تاريخ اخر وكتبت لى هويته اخرى
وابتعت لى اوراق اكثر بياضا
لنكتب فيها سويا
احلام ً جديده
احلامً ملونه
لنخط فيها سويا مستقبل ممزوجا بالحب والسعاده الابديه
اعترف
انك من كتبت تاريخى بماء الذهب ورحيق العسل
اعترف
انك من علمنى الهوى والحب
وانا التى كنت ازعم اننى ملكه العشاق
اعترف
انى كنت ابحث عنك ولكننى لم اتخيل يوما
اننى ساجدك يهذا النقاء والصفاء والصدق

فليحفظك الله لى وليحفظنى لك



وعرفت الحب

على هامش البوست
انا عارفه انى اهملت المدونه وحاجات تانبيه كتير
وانكم وحشتونى موووووووت بس اعمل ايه الحب وسنينه
ادعولى واعبالكم واللى بيحب يحب اكتر
بحبكم جميعا فى الله

خبر سعيد جدا جدا

يا دبلت الخطوبه عقبالكم كلكم

।

।

ان شاء الله

رقصه الالوان

الكثير من الالوان فى كل شى على فراشى

.
بين اصابعى فى رأحتى على الحوائط

.
فى السماء وعلى الارض المفروشه بالازهار

.
ترقص حولى ومعى

.
تخبرنى أنك ستاتى

.

تبتسم لى وتهمس فى أذنى

.
انها جاءت من عندك
فأعلم انك قادم

.
لتجعل ايامى أكثر سعادة

شكر

حين رحلت كنت اظن أنك مدين لى باعتذار

وعلمت من الايام

..

انى أنا المدينه.

لك بالشكر

..

فبدونك أصبحت أقوى

-----

فلك منى كل الشكر

.

.

.

سمسم

2008

لست ملاك

لست ملاك واكرة ان تصفنى بذلك

كما انى ليس شيطان واكرة ان اكون ذلك

ولا اريد الا ان اكون كما انا بشرا

احمل بداخلى جميع المتناقضات

اعيش بروح الملائكه وشقاوة الشياطين !

ولا اريد صفه الملائكه التى تطلقها عليا

لانى اشعر حينها انك تتحدث عن اخرى

فانا الاافهم حياه الملائكه ولا اريدها

انى اريد ان اصيب واخطا

احب واكرة ...اموت واحيا

احزن وافرح ...انجح وافشل

فانا فى النهايه بشر

ولا شى غير ذلك

سمسم

2008

قف .......ممنوع

لن اقبل مساومتك لى ابدا
ولن اتنازل عن مبادى مطلقا
نعم سيدى
احترمك واكن لك كل تقدير
ولكن
احذر سيدى من غضبى
واحذر من الاقتراب منى بطريقه لا تعجبنى او تثير الريبه فى نفسى
فانى فتاة
لا تقبل المساومه على اى مبدا من مبدئها مهما كان الثمن
واعلم
انى مبادى وعزتى بنفسى اغلى بكثير من ما تساوم عليه


احيانا تكون فى حياتنا اشياء غاليه
ولكن حين تساوم عليها فى مقابل اشياء اخرى
تكتشف ان الاشياء الاخرى اغلى بكتير جدا
سمسم 2008

الحاج محمد

يجلس الحاج محمد فى تلك الشرفه المطله على الشارع الرئيسى وحيدا متجهماُ وبجواره ذلك الهر الذى اظن انه صديقه الوحيد
لم اراة يبتسم منذ زمن بعيد ولم اجد سبب لذلك
ومنذ ايام قليه بدات اراقب حزنه من بين عينيه الضيقتين فقد بدا شاحب الوجه كما انى لم اجد هرة الصغير بجوارة
يبدو انه سئم صمته فهرب وترك الحج محمد حزين جدا
وفى اليوم التالى
حاولت الاقتراب اكثر من شرفه الحاج محمد ولكنى رهبت من حزنه واكتفيت بالنظر اليه كلما مررت من امام شرفته
وتوالت الايام
ولفت انتباه الحج محمد نظرى اليه
فابتسم لى ذات مرة
نعم رايته بيتسم لاول مرة منذ زمن
فاقتربت منه قائله : صباح الخير يا عم محمد
نظر اليه طويلا وكانه لم يفهم ما قلت وخيل الى انه نسى الكلام من طول صمته
فهممت بالانصراف
فبدا الانزعاج عليه فتوقفت فسمعته يقول :صباح النور اصل انا بقالى كتير محدش صبح عليا ولا اتكلم معايا
ويبدو انه بدا يسترجع جميع ذكرياته مع الكلام وهم بحكايه حكايات عن ايام الشباب وكانه كان ينتظرتلك الصباح ليتحدث مع اى احد لكى يخرج من وحدته
ولكنى حين نظرت فى ساعته المعلقه على الحائط ,ورائه

ووجتها تفترب من العاشرة والربع
اى اننى من المفترض ان اكون فى عملى منذ ربع ساعه تقريبا
فاستاذنته وانصرفت مسرعه
تاركته لوحدته وصمته مرة اخرى

الا انى هذا المرة تركته وانا اعلم سبب
لوحدته وصمته
انه تلك الساعه المعلقه على الحائط ورائه
التى تلهى الناس عن كل شى حتى لو كان ذلك القاء التحيه والاستماع للحاج محمد
ولو لدقائق قليله

فلترقص معى

فالترقص معى هذا المساء..... ولتدعك من كل الاحاديث فلا اريد ان اسمع شى

سوى انفاسك الملتهبه ودقات قلبى المسرعه

فلترقص معى هذا المساء..... وتنسى من انت وتنسنى من انا

فلترقص معى هذا المساء... وتدعنى اعيش بداخلك ولتعيش فى داخلى

فلنرقص فى صمت ....فلنرقص فى صخب

فلترقص معى ولتدع خصلات شعرى تطير فى الهواء ولتدعنى اتمايل على زراعك فى دلال

سمسم

2008

رحيل اخر

رحلت ايضا تلك اللوحات
احيانا يكون الرحيل افضل من البقاء
।
।
।

ورحلت منذ ايام قليه سنه اخرى من عمرى
احيانا يكون الرحيل مطلوب لاتاحه فرصه للجديد
।
।
।


ورحلت عن افضل صديق لى
فاحيانا يكون الرحيل مؤلم جدا ولكنه ضرورى
।
।
।

ورحل عنى هذا الازعاج اليومى
واحيانا اخرى يكون الرحيل مفرح
।
।
।

فليس كل رحيل محزن كما انه ليس كل بقاء مفرح
।
।
।
॥
।

سمسم 2008

عذراُ

عذراُ سيدى
فلم يكن رفضى لشخصك الجميل
ولكنى فتاه تهوى الجنون المسمى بالحب
وانت فيك من العقل ما يكبت جنونى



عذراُ صديقى
لانى رحلت دون ابداء اسباب
فصمتى افضل جواب
فعذراُلايامى القادمه من دون صدقتنا



عذرا ابى
لجنونى وتمردى
الذى اعلم انك تعشقهم بداخلك
فعذرا ممزوج بكل كل الحب



عذراُ استاذى الجميل الرائع
لعدم مقدرتى على رد ولو جزء صغير
من ما تفعله معى
فعذرا ً وتحيه وشكروتقدير كبير



عذرا
لكل من قابلته يوما ُ
ورحل عنى او رحلت عنه
وعذراُ
لمن بقى على صدقتى ووجودى فى حياته
وتحملنى بعصيانى وجنونى


وعذراً اخيرأُ
لكل احلامى المؤجله رغم عنى


سمسم 2008

عام جديد

اعتد ان اعيد ترتيب اوراقى مع بدايات العام الجديد

امحو الاحلام والامنيات القديمه من على الحوائط والابواب ومن داخلى

لايهمنى ان كانت تحققت باكملها فقد مضى عامها

اعلق امنياتى الجديده هذة المرة فى كل مكان

احلامى هذا العام ملونه بالوان كثيرة

ممزوجه ببروده الازرق وحرارة الاحمر وتسلط الاصفروبراءه الابيض حتى الاسود له معى امنيات

ولكن

تبقى امنيه وحيده لى تنتقل معى من عام الى عام

بعض منى

رحلت عنى هذة المجموعه من اللوحات لتسكن فندق من فنادق سيوه ... طبعا مشكله لانى بحب لوحاتى جدا ومش قادرة على بعدها

--------

بس اللى مش قادرة استوعبه لحد دلوقتى انى لما اودى اللوحات تتبروز هناك ممكن ترجع كده

كده

دى يعنى بالسلفان اللى انا حطاه على اللوحات على شان طبعا متبهدلش فى السفر ........انها تتبروز بيها

الحمد لله انها متبروزتش بالكرتون اللى كان عليها

مش قادرة اتخيل

الناس هناك طيبين جدا لدرجه مش ممكن يبروز اللوحات بالسلفان

مش قادرة اصدق بجد والغريب انك لما تسال حد هناك يقولك اه

صح تتبروز بالسلفان

..........

تحديث

الصور متبروزة ازاز يعنى السلفان تحت الازاز ... محدش يقولى السلفان هيحافظ عليهم

معلش يا جماعه الموضع مديقنى بجد

.....................................

ليله بارده

بدا الشتاء تسلل الهواء البارد الى غرفتى عبر نافذتى الصغيرة ..تسرى البروده فى جسدى اتحسس اناملى اكاد لا اشعر بها ....اغفوا قليل .

..اتذكر حلمى القديم (فتاه وحيده تسافر الى كل مكان والى اى مكان حامله اوراقى والوانى ارسم كل شى تقع عليه عينى ) كم احب ذلك

تشتد البروده ..مازلت ابحث عن الدف

اقلب اوراقى القديمه ..هذة صورة لى مع زملائى ,,يالقسوة الايام لم اعد ارى احد منهم اننى بالكد اذكر أسماء البعض منهم ولكنة ما زلت اذكر جيدا كل ايامى معهم

استمع لصوت الرياح بالخارج تشتد البروده اكثر لم اعد اشعر بوجود اطرافى

اقلب اوراقى من جديد هذة المرة ..انى ابحث عن شى ولكن ترفض نقسى البوح به .. يبدو انى وجته ..انه صورتك المرسومه بيدى ..اذكر خطوط وجهك جيدا ها انا احدق فى عينيك الرماديتين ..لقد تجمعت بهم كل اسرار الكون

يرتعش جسدى كلما نظرت الى شفتيك ..تذهب البروده عنى ياتى الدف لا اعلم من اين ..ارحل عن مكتبى هذة المرة اسمع صوت الامطار بالخارج ولكنى لا اشعر باى بروده

يبدو ان الشتاء قد هرب من حجرتى وبقى دف روحك معى

....................................................................................

القوي الخفية

بوستر -1

بوستر -2

غلاف _1
غلاف -2
صفحه -1

القوى الخفيه

التى فى داخلك وانت لا تدرى صفحه -2

زن

هى الصيغه اليابانيه لليوجا الهنديه صفحه -3

هولاء أناس عاشوا قبل ذلك

صفحه -4

هذا الذى يسمونه

السحر الاسود

صفحه -5

اذا نظر أحد فى عينه فانه يستسلم صفحه -6

راسبوتين

الراهب الرهيب

أحبك

أحبك

عندما تغرب الشمس وتقبل مياة الانهار

أحبك
عندما ياتى الربيع وتتفتح الازهار
أحبك
عندما تشتد الرياح وتسقط الامطار

أحبك
عندما افقد عقلى وتتشتت الافكار

أحبك

فى كل وقت ومع كل طلعه نهــــار
أحبك
ولن يجف حبى لك ولو جفت المياة وانعدمت الانهار
أحبك
ولو شاءت ان تفرقنا الاقدار
فأنت

كقطع السكر تذوب فى فمى وتختبى بداخلى تاركه ورائها دوما ذلك المذاق الحلو لتذكرنى بها

كما اشعر بهم

عاطفتى تسبق عقلى فى كثير من الاحيان

-----

فعندما ارسم الاشخاص أرسمهم كما اشعر بهم وليس كما هم على الطبيعه

الا ان من يعرف هولاء الاشخاص يكاد يجزم انهم هم مع اختلاف الشكل تماما

(فان العبرة ليست ابدا فى معرفه الناس ولكن , فى الاحساس بهم )

-------

الناس اللى فوق دول زميلى فى الشغل بس انا مش معاهم على شان انا اللى كنت بصور

وحده

على الكورنيش

ولد وبنت ....وولد وبنت .... وولد وبنت ... وبنت وولد

وبنت لوحدها ؟

رسومات ناقصه

كثيرا ما ابدا رسومات ولكنى لا انتهى منها

لا لشى الا أننى عندما أبدا بالرسم أنظر للتكوين ككتله واحده كامله فلا التفت كثيرا للتفاصيل الصغيرة

الا عندما ابدا بالتلوين او التظليل ومتابعه الظل والنور

فتظهر العيوب لانى حينها اكون قد بدات فى متابعه التفاصيل الصغيرة

فاتركها وابدا من جديد

الا اننى دائما ما احتفظ برسوماتى الناقصه

من غير كلام

عيد سعيد

كل سنه وكل الناس طيبه وبخير

ويارب يكون رمضان قبل منا

انتظرونى قريبا

كل سنه وانتم طيبين

يا الله

بسم الله والصلاة والسلام على رسول الله فمن يهديه الله فلا مضل له ومن يضلل فلن تجد له وليا ًمرشدا

عَن أَبي الدَّردَاءِ رَضِي اللَّه عنْهُ أَنَّهُ سمِعَ رَسُولَ اللَّهِ صَلّى اللهُ عَلَيْهِ وسَلَّم يَقُولُ : (ما مِن عبْدٍ مُسْلِمٍ يَدعُو لأَخِيهِ بِظَهرِ الغَيْبِ إِلاَّ قَالَ المَلكُ ولَكَ بمِثْلٍ) رواه مسلم

وعَنْهُ أَنَّ رسُول اللَّه صَلّى اللهُ عَلَيْهِ وسَلَّم كانَ يقُولُ : (دَعْوةُ المرءِ المُسْلِمِ لأَخيهِ بِظَهْرِ الغَيْبِ مُسْتَجَابةٌ ، عِنْد رأْسِهِ ملَكٌ مُوكَّلٌ كلَّمَا دعا لأَخِيهِ بخيرٍ قَال المَلَكُ المُوكَّلُ بِهِ : آمِينَ ، ولَكَ بمِثْلٍ) رواه مسلم

احبابى فى الله

اتى شهر الخيرات اتى شهر الدعوات شهر المغفرة والبركات

شهر يستجاب فيه للمومن ويغفر فيه للغافل ويعتق من النار كل راغب

فادعو الله موقنين بالاجابه ادعو الله بكل ما تريدون

وان كان دعاء الاخ المسلم لاخيه بظهر الغيب مستجاب فى اى وقت فمابالك بشهر استجابت الدعوات

دعوة منى ان ندعو لبعض

اعدو الدعوات وسندعو سويا فى هذا الشهر ان شاء الله

سابدا اولا

دعواتى الخاصه ادعو لى

1 الهم احفظ لى ابى وامى واخواتى كما حفظت القران

2 اللهم بلغنا جميعا ليلة القدر

3 يارب اختى تتجوز واخويا ينجح وربنا يهديه على شان مجننى

4 انا يارب ارزقنى الزوج الصالح الذى يعننى على طاعتك واجعل بينا الموده والرحمه والسكن

5اللهم ارنا الحق حقا وارزقنى اتباعه وارنى الباطل باطل وارزقنى اجتنابه

6 ربنا لا تزغ قلوبنا بعد اذ هديتنا وهب لنا من لدنك رحمه انك انت الوهاب

7 دعاء لكل احبابى فى الله

يارب يبارك فيكم ويرزقكم الاخلاص فى القول والعمل ويبلغنا رمضان وليله القدر

ويرزقنا قبل الموت توبه وعند الموت شهاده وبعد الموت راحه ونعيم ان شاء الله

----------------------------

وفقنى الله واياكم الى ما يحب ويرضى

وكل سنه وانتم طيبين

ورمضان كريم

ذكرى

اليوم هو ذكرى فراقى لك
كم كنت أحبك
مازلت اذكرك
مازلت اذكر كل شى فيك
حتى طريقى اليك اذكر كل تفاصيله
كم هى الساعات التى قضيناها سويا
كم هى الرسومات التى تقسمنا أحساسها معا

مع انك لم تكن لى الا شهور قليله
الا انى اقسم انها قضيت معك اجمل ايام فى عمرى
مازلت اريدك واطوق شوقا اليك
بالرغم من طول المسافه بيننا
و معرفتى انك اصبح لغيرى

الا انى اذكرك دائما وساظل كذلك
لن انساك يا مرسمى العزيز

ملحوظه

صورة التدوينه لى

ساخبرك انى احبك

ساخبرك انى احبك
ساجلس بجوراك واترك يدى تحتضن يدك ..واضع راسى على صدرك لتضع أنت بدورك يدك الاخرى على شعرى
وتظل تعبث به وانا أروى لك الحكايات ..ساخبرك الالاف القصص والرويات عن كل شى
ساهمس بينما تنصت اليا انى احبك
ولتمر ساعات وساعات وانا مازلت اخبرك بحكاياتى
وانظر بعينيك وانت تضحك منها
فاترك اناملى الصغيرة تكتب على جسدك انى احبك
فاسكت لتسمع دقات قلبى
ان دقاته تتزايد
كم انا سعيده بذلك


سأروى لك الآن أجمل قصصى
انه قصه حبى لك
ساخبرك كم من المرات حلمت بك
ساحكى عن عشقى اليك
واقف وانفعل وانا اشرح كيف كنت أبحث عنك
وما انا أعلم انك علمت
حتى اهدا وأعود الى جوارك
لتنتهى كا حكاياتى
وتبدا حكايتنا معا ً

اومازلت تريد ان اخبرك كيف احببت
لن اروى حكايات بعد الان ساعيشها معك

تحديث

------

تم تغير أسم البوست من مشهد من الخيال

الى ساخبرك انى احبك بناء على طلب

ممكن

يارب

اللهم انى أشكو اليك ضعف قوتي،

وقله حيلتى ،وهوانى على الناس ، ،

يا ارحم الراحمين ،

انت رب المستضعفين،

انت ربى

، الى من تكلنى ؟

الى بعيد يتجهمنى ؟

ام الى عدو ملكتة امرة ؟

ان لم يكن بك على غضب فلا أبالى ،

ولكن عافيتك هى اوسع لى ،

أعوذ بنور وجهك الذى اشرقت له الظلمات ،

وصلح عليه امر الدنيا والاخرة من أن ينزل بى غضبك ،

او يحل على سخطك ،لك العتبى حتى ترضى ،ولا حول ولا قوة الا بك .

اكرة انوثتى

اكرة انوثتى التى تخجل من البوح بالحب فقط لانها انثى

اكرة انوثتى التى لا بد لها من البقاء فى البيت ليلا خوفا من الذئاب فى الخارج

اكرة انوثتى التى تبحث دائما عن ادم لتختبه بداخله اكتر من بحثها عن نفسها

اكرة انوثتى التى شرفها معلقا ً دوماً بعشاء بين فخديها

اكرة انوثتى التى تفرض عليا الكثير والكثير من الممنوعات والمحظورات

اكرها واكرها

عندما يخبرنى الاخرين اننا لابد لى من ادم لكى اكمل عمرى وانى بدونه ناقصه

اكرها عندما انظر الى عمرى الصغير وكيف مر خجل من غير حب فقط لاظل محتفظه بتلك الانوثى

اكرة فانها تمنعنى حتى من اكمال كل فرائضى كالرجال

والان اعلنها انى اتمرد عليها

سارفع صوتى بكلمات الحب ان احببت

ساعيش بدون ادم

ان لم القا يوما ادم يقدر تلك الانوثى المتمرده

-------------------------

أحبك يا أمى

تسللت اليها
أرتميت فى احضانها
ضمتنى دون كلمه
لتشعرنى بانى مازلت أحيا
عادت اليا نفسى مرة اخرى
فغرقت فى النوم بجوارها وفى احضانها

بعد ان كان فارقنى النوم لليالى طويله
ما احلى الشعور بالامان والحب
قمت من جوارها
وكاننى أخرج من رحمها مرة اخرى
ولكن هذة المرة دون بكاء
كم احبك يا امى
كم اعشق حضنك الدافى
حنانك الانهائى
امى انتى عندى اغلى من وجودى
احبك احبك احبك
مازالت طفلتك الصغيرة كم احب هذا
فليحفظك الله لى
يارب لك الحمد كما ينبغى لجلال وجهك وعظيم سلطانك
ان رزقتنى ام بهذا الحنان

رغبه فى البكاء

اكرة ان اصاب بالاكتاب
كما اكرة الظلم
تنتابنى رغبه عارمه فى البكاء
اتمسك باخر خيط لى من الايمان
تنساب باقى الخيوط من بين يدى رغما عندى
اريد الصراخ
لماذا يا الله

ارجع اتحسس خيطى الباقى
لا استطيع الاحتمال
تتهاوى قواى

انظر الى النيل ياااه كم اريد ان اقبع بداخلك
الا انى خيطى الوحيد مازل يدفعنى بعيدا

اصرخ هذة المرة بصوت اعلى

اريد الخلاص من هذة الدنيا
يجذبنى الخيط هذة المرة الى بعيد
تصمت صرخاتى
ولكنى لا استطيع ان امنع نفسى من البكاء

نداء الغروب

مع كل غروب ينبعث من قلب الحياة صوت ينادى يأبنى الأنسان

توبوا الى بارئكم ..توبوا الى الله ولا تغركم الدنيا أو تنسوا ذكر الله ...الأترون أن لكل شئ نهاية ؟

أتنظروا الى الشمس كم تكون بهية تزهى بنورها ثم تصبح واهنة تستسلم للغروب

أذكروا الله

قبل ان تغرب شمس الحياة ..؟

والله ما عصيت الله عمداً ولكن غرتنا نفسى ووسوس لى الشيطان وغرتنى شهواتى

فاغفر لى ما تقدم لى من ذنب وما تاخر

يارب

لأن سالتنى عن ذنبى لأسالنك عن عفوك

ولان سالتنى عن معصيتى لأسالنك عن رحمتك

ولان القيت بى فى النار لاخبرنا أهل النار أنى أحبك

مين الصح

الحكايه بتقول

ان كان فى ملك والملك خلف ولد بس الولد ربنا خلقه بودن واحده

زعل الملك وفضل يفكر كتير أبنى بودن واحده والشعب كله بودنين لازم أعمل حاجه على شان الناس كلها تبقى ذى ابنى وميتعقدش

بس وطلع فرمان

كل الشعب يبقى بودن واحده واى ولد بتولد يتقطع ودنه من ودانه

وكبر الأمير وبقت عاده وتروح الأيام وتيجى الأيام

وكل ما مولود يتولد يتقطع ودن من ودانه

لحد فى يوم كده دخل البلد غريب

والغريب بودنين

الناس تبص عليه وتقول الاهبل ابو ودنين

بص يا عم تعالى اتفرج- يا سيدى الحقى -العبيط بودنين

والراجل مش فاهم

مين الصح مع انه هو الصح يقطع ودن من ودانه على شان يبقى شبة الناس التانيه ولا هو كده صح وهما الغلط

بس معقول كل البلد غلط

هى دى الحكايه

(فليس بالضروره ان وجدت الناس يفعلون شى واحد انه الشى الصواب )

كما ليس بالضرورة ان شعرت انك على صواب فانك كذالك

سالقاك يوم ما

بحثت عنك كثيراُ 00 حتى وجدتك اخيرا

بداخلى 00تمتزج بروحى 00تعيش فى خيالى

كنت اشعر بوجودك دوماُ فى كيانى وبين ضلوعى

وربما كنت انا المختبى بداخلك

لا يهم

الا انى وجدتك اخيرا

ويوما ما ساعنقك سانام بجوارك كطفلى كانثى

واهرب من كل عمرى بين عينيك واذوب عشقا بين شفتيك

وابدا عمرى الجديد فى احضانك

فعذراً لايامى الماضيه من دونك

الف مبروك

اخيرا حصلت مصر على المركز الاول

مش عاوزة اى حاقد ولا منفسن ولا حاسد يقولى حصلنا على المركز الاول فى ايه

المهم انه المركز الاول

حصلنا ولله الحمد على المركز الاول فى اكثر عواصم العالم تلوثاً واكثر شعباً القاء للقمامه والمهملات فى الشوارع

الف الف مبروك

ولا عزاء لمرضى الصدر والحساسيه

حين تغيب

حين تغيب

تصبح كل الوجوة أنت وكل الاصوات صوتك

تنحصر كل الكلمات فى كلمه أحبك

فقط عندا أعلم انى أحتاج اليك

فقط عندها اعلم انك أنت من كنت أبحث عنة

فلا احتاج الى اى كلمات لاعلان حبى

فقط أحبك دون اى كلام

أحبك

(احيانا لا يدرك الانسان الحب الا بعد فوات الاوان )

تحديث

الكلام ده كتبته من وحى روايه واحه الغروب .... بهاء طاهر

اعتقد حين اجد حبى لن انتظر حتى افتقده لاعلم انه هو من احب

علامة تعجب

لا بد انك توقفت يوما ما امام شى عجيب وظهرت تلك العلامه !!!!!!! فى راسك للتعجب معك دون ان تفسر لما التعجب بل لتزيدك حيرة

يعنى انا افتكر ان دائما كان طلبه فنون جميله سبب فى تعجب ناس كتير

يعنى اول مرة نروح نرسم فى شوارع القلعه الناس صحيه الساعه 9الصبح لاقت ناس مش عارفه مين دول قاعدين فى الشارع بتاعهم الا ايه بيرسمه هما طبعا عمرهم ما تصورو ان شوارعهم وبيوتهم

ماده فنيه تصلح للرسم وفى ناس بصتلنا واتعجبت وخلاص وفى ناس سالت انتم بتعملو ايه

هو دة اللى انا عاوزة اقوله لا تدع علامة التعجب فى راسك الا لما تسال ليه وتحاول على الاقل تعرف الموقف ده عجيب على شان ايه او الشى ده انت اتعجبت منه على شان انت مش عارف معناه والا هو فعلا عجيب بالنسبه لخبراتنا ومعطياتنا

فكل شى عجيب بالنسبه لك هو شى عادى بالنسبه لاخر

يعنى لما الفراعنه بنو الاهرام مكنش فكرهم انها بيبنو عجيبه من عجائب الدنيا

عندهم الاهرام مقابر وتودى وظيفه

فعلامات التعجب فقط توجد بداخلنا فقط لاننا لانعلم فاذا علمنا انتهى التعجب

ياترى ايه اكتر شى ممكن تتعجبه منها
غير المدونه بتاعتى طبعا

للعلم الرسمه دى بتاعتى
يعنى التعليق على الرسمه اهم من البوست
سمسم 7/2007

أنتظار

دائما ما ننتظر شى ما هل يوجد احد منا لا ينتظر شى

كل منا له اوقات انتظارة الخاصة

من اول الانتظارات اليوميه العاديه

الاتوبيس ,الاشارة تفتح , الفطار دا لو صايم ,والغدا فى الايام العاديه ,مستنى حد جاى

الى الانتظارات الموسميه نتيجه الامتحان ,اسبوع المصيف ,بابا يرجع من السفر ,فرح صحبتى ,خطوبتى

وصلا ًللانتظارات ذات المدى البعيد مستنيا اتجوز مستنى يتجوز مستنى يتعين فى الشغل او يلاقى اصلا شغل

مستنى اول بيبى واول حفيد

وسلسله طويله من الانتظارات لاتنتهى ما دمنا على قيد الحياه

الا انى ليا فى الانتظار فكر اخر

اولا انا مبحبش فكرة الانتظار اصلا

يعنى انا صعب جدا استنا حد كتير اول استنا حاجه الا انك ساعات بتجبر على دا

يعنى مستنيا نتيجه الامتحان هعمل ايه يعنى والاشارة تفتح اخويا يجى يوصلنى ومعرض الكتاب

المهم على شان الرغى الكتير

انا شايفه انا الانتظار فكرة سخيفه وان الانتظار لا ياتى بالاشياء بل ربما يضيعها

مثال

انا كنت مستنيا اخويا فى مكان وهو واتاخر كتير جدا كلمته لاقته بيقولى الطريق واقف من بدرى ووصلا انا الحل على شان نتقابل ...ان ينزل من الموصلات ويمشى شويا وانا كمان ونتقابل فى نص الطريق وبالفعل 3دقائق واتقبلنا تخيلو بقا لو كنت فضلت انتظر وهو كمان ---مكناش هنوصل فى يومنا وهنضيع وقت كتير

هو دا اللى انا عاوزة اتكلم فيه

المهم عندى

انى عاوزة اقول ان بدل ما ننتظر سهل جدا نروح احنا للحاجه اللى عاوزنها بدلا ما عمرنا يضيع واحنا منتظرين دا حتى فين ناس منتظره وهو مش عارفه منتظرة ايه

بدل ماتستنا الاشارة تفتح هى مش هتفتح الا فى معادها اعمل حاجه مفيده سبح مثلا

بدلا ما تستنى عريس اعمل حاجه اهم اتعلمى لغات قران اى حاجه تفيده بيها اولادك لما تتجوزى

بدلا ما نستنى الشغل دور على الشغل انت فى كل حته اتعلمه مهارات جديده ليه لا

وكل حاجه على كده

احسن ما عمرنا يضيع بس فى انتظار اشياء قد لا تاتى لانها ببساطه لا تعرف الطريق اليك

لابد انت من تذهب اليها

فلا تنتظر شى فقط اذهب اليه

اغتيال البراءة

هند كانت طفله فى العاشرة من عمرها عمر الزهور كما يقولون الا انه لم تصبح كذالك هند اصبحت ام لطفله اخرى لا استطيع ان اتخيل الموقف التى تعرضت له هند فقد قام شيطان باغتصابه نعم شيطان بعد ان تجرد من كل صفاته البشريه والحيوانيه ايضا لا اعتقد انه حتى يوجد حيوان يستطيع اغتيال هذة البراءة

الى هنا توقف الخبر

الا اننى من وقت ان علمت وانا اصبت باكتاب شديد وتفكير مستمر فى مصير تلك الصغيرة وتلك الشيطان مغتصبها فهو الان حر طليق محدش يسالنى ازاى اهو حر على شان دى طفله ومش متاكدين من كلامها

حسبى الله ونعم الوكيل

انا بس عندى شويا اسئلة نفسى اعرفلها اجابة

ما هو مصير تلك الصغيرة وطفلتها ؟

كيف فكر هذا الشيطان باغتيال تلك البراة فى اى شى كان يفكر وقتها اى فكر هذا الذى جعله فعل ما فعل ؟

هل تلك الشيطان ايضا مجنى عليه نتيجه الظروف والتربيه الخاطيه والضغوط ؟

اعذرونى يا جماعه ما اصل المسالة مش ممكن تكون فرديه لازم يكون وراها حاجه

دا مش حاله واحده بعد هذة القضيه اكتشفت ان هناك حالات اخرى كتير وان الاطفال هى المستهدفه الان على اعتبارهم فريسه سهله دا غير اللى منعرفوش والذى لم تسلط عليه الاضواء؟

هل نحن جميعا مجنى فى ظل مجتمع غابت عنه اخلاقياته؟

مش عارفه اقولكم اية نخبى ولادنا واخوتنا على اعتبار ان الشارع خلاص بقا كله ذئاب بشريه

هذا ما حدث بالفعل من بعض الامهات الذى اعرفهم

نقفل على نفسنا ونعمل مش واخدين بالنا ذى ما حصل كده ما سفاح المعادى وغيرو

لحد ما الموضوع يهدا ويعدى وكان شى لم يكن

ندعى على تلك الشياطين فى المساجد وفى كل صلاة

انا متهيالى المساله اكبر من كده

فى المطبخ

ماما وبابا النهارده قررو يعملو فينا مقلب مش عارفه ليه

صحيت الصبح الساعه 7 اه والله 7 لاقيت ماما بتلبس هى وبابا راحين فين

ماما

بابا واخدنى يفطرنى برة ..... قلتلها ايه وليه كده وبصلتلى وقالتلى تيجى معانا وهى موقنه انى سافضل النوم

واول ما نزلو طبعا انا جرى على السرير اخيرا هنام يوم اجازة من غير ما ماما كل شويا يا سمسم وقومى ابويكى عاوز يفطر اقومى حضرت الفطار يالا الساعه بقت 7 ,7ونص 8 ولحد ما اقوم طبعا

وانا غلبانه معرفش نمت صحيت الساعه 10 لسه مفيش حد دخلت عند اخواتى نايمين .........فرصه بقا

الساعه 11 طيب اعمل نسكافيه

اخواتى قامو من النوم

12,30

بدانا نسال هما ماما وبابا فين

شويا وابن عمى الصغييرصحى اصل بايت عندنا

الساعه 1.00 طيب الصلا ة نزل اخويا وابن عمى

يالهوى دا هيطلعو عاوزين ياكلو

اعمل ايه

المطبخ

التلاجه يانهار ابيض ايه دة يا ماما مفيش اكل ما عمول يعنى المفروض انى انا اللى اعمل الاكل

وكمان غدا ما الفطار راح خلاص

المطبخ مكركب

البدايه

يا مشمشمه اختى يعنى هنعمل ايه ترد : معرفش

فى لحمه فى التلاجه وررق عنب يا سلام انتى فاكرة انى ممكن اعمل محشى تكمل وبتنجان كمان

غيرو : لوبيه ماما نقعاها من امبارح

اه بس اتدبست

ابتدنا نكون فريق العمل

انا واخويا واختى وابن عمى

زيزو ابن عمى انت انزل اشترى عيش

اخويا حبيبى الطمام فى الخلاط على شان خاطر اختك

انا بصل لالالالالالالا بصل مش مهم طيب وبعدين اعمل ايه تانى

توم كمان وادور فى المطبخ على بطرمان السمنه ابدا خلاص نطبخ بزيت اهو بردو مفيد

وحطيت البصل على التوم على الزيت يا خرابى اعمل ايه تانى اخويا جاب الطماطم

كويس

مشمشه الا ايه لازم تعمل كفته ده وقته

طيب

ملح ويبقى لازم فلفل وصلصل يا لهوى ربنا يكون فى عون اللى هياكل

الرز لازم رز

ماشى انا بعرف اعمل رز اه هموت الجو حر فى المطبخ

مشمشمه بافكرها ماما وبابا كده ممكن يجو معاه حد

ممكن مامته زيزو واخواته يكونه راحو يجبوهم ما اصلهم مبردوش على الموبيل

معلش نعمل محشى ايه يعنى هسلق ورق عنب وااقور بتنجان انتى بتستعبطى

ومين اللى هيعمل الخلطه

الحقوووووووونى يا ناس

الساعه بقت 3 ونص

نتصل بماما وبابا ابدا

لامفر اعمل محشى

طبعا كانت اللوبيه قربت تتحرق على النار هى والرز

وانا اعرف من فين

وابتدا قصه المحشى اخويا حبيبى لا انا مليش فى المحشى

لا على شان خاطرى بس انزل اشترى الخضرة بتاعه المحشى

اه يانى

وزيزو معايا قال يعنى هيسعدنى ماشى

بتنجان ومقورار وانا وررق عنب على النار ياخرابى

مشمشه لسه فى الكفته بتاعتها سبيها فى حاله

وطبعا اخويا كان انضم لها فى عمايال الكفته

والله لصورهم بس

الصور ممنوعه من العرض على شان الواد بردو سمعته

يقوله ايه بيصبع كفته

سلطه اه نسيت بابا لازم سلطه يازيززززززززو

انزل هات خيار وخص من تحت

كده بردو يا ماما طب قوليلى

اه على اللى جرالى فى المطبخ

من غير ما اطول عليكم

عاوزة اقولكم ان تمت المهمه بنجاج ساحق لدرجه ان اننا من كتر التعب مش قادرين ناكل حاجه

ياترى انتى فين ياماما انت وبابا

ربنا يكون فى عون ماما بجد كل يوم الشغلانه دى وكمان بنحب ومبنحبش

خلاص حرمت

شايفين ايه

ما معنى هذة الصورة ؟ ماذا يريد الفنان ان يقول ؟

هذا هو السؤال الذى يلتقى به الفنانين دائما ازاء العمل الفنى

الا ان الصورة ليس شى قابل للشرح والتفسير ولا ينبغى ان تكون

فهى بالفعل ليس مادة قابله للترجمه من لغه الى اخر

ان ما اراد الفنان ان يقولة فقد قاله بالفعل فى داخل اطار صورته .

فالفن لغته التذوق

اى ان عندما يشاهد المتلقى العمل الفنى فانه يعيد العمل الفنى بشكل أخر

يقول :بول فاليرى
ان عمليه الخلق عند الفنان انما غايتها هى اثارة عمليه خلق اخرى عند المتذوق

ويضيف :جون ديوى

ان على المتذوق ان يعيد بناء العمل الفنى المقدم له على نحو ما خلقه الفنان

كما يقول الفيلسوف الانجليزى :كولنجوود

ان المتذوق للفن فى حد ذاته فنانا الى حد ما

...........................

فان كان لاحد ان يقول معنى الصورة فهو المتذوق وليس الفنان

اللوحه عنكم كل واحد يقول اللى شايفة

والاسم اللى يعجبة

اخويا بيتعاكس

انت يا واد يا سكر انت ... يا لهوى على القمر يا ناس .. ..هو فى كده فى الدنيا ايه يا خواتى العسل ده

ايه أخويا وبعاكسه ومعجبه بجماله مش اخويا عادى جدا بتحصل

اللى مش عادى انى ابقى ماشيه مع اخويا وواحده تعاكسه

اه والله البنات بتعاكس الشباب دلوقتى مش انا بنت بس بقول بيحصل

دا انا شفت بنفسى ولا كان ممكن اصدق ابدا ......لكن قصاد عينى يا ناس

قلت: معلش ما الواد بردو ذى القمر ويتعاكس يمكن بس على شان لسه صغيير صغيير ده عنده 18 سنه

رحت احكى لزميلى فى الشغل قالى اه والله حصلى انا كمان

قلتله: نعم احنا هنهزر قالى : والله حصل

دا بقا على شان كبير شويا مكنتش معاكسه وبس يا لهوى هى وصلت للدرجادى

جرى مكدبتش خبر قلت اسال تانى بردو

روحت على واحد تانى لسه هتكلم لاقيت الواد وشه احمر مالك قالى اصل كان فى واحد بتعاكسنى النهارده فى الميكروباص

سكت ..وقالتلة :ازاى قالى : يا بنتى كل شويا تلزق فيا ولابسه هدوم استغفر الله العظيم ابعد بردو تلزق

ابصلها ابدا رحت قلت : مبدهاش بقا انزل احسن لاقتها راحت بصالى بصه انت مبتفهمش ولا حمار ولا ايه تصدقى والله حصل

قلتله اصدق

وحكايات كتير بقا كل ما اقول: لحد اخويا بيتعاكس الاقى هو كمان يروح حكيلى حكايه

وطبعا فى حكايات ممنوعه من العرض على شان الرقابه

المهم هنا طيب البنات وبنات والشباب عندها كبت وفى بنات بصراحه لابسها ومشيتها قصدها تتعاكس دا معروف

انما اعاكس واد ليه ليه يا ناس

الاخلاق راحت فين والخجل بتاع البنات اتخصخص هو كمان ولا ايه

ولا تكنش دى من مساوات المراة بالرجل هتعاكس هعاكس ومفيش حد احسن من حد

طب اقولك سر انا اعرف انى البنات لما بتتعاكس بتفرح على اساس انها بنوته حلوة انما

ياترى الولد لما بيتعاكس بيحس بايه

بيتكسف بردو ووشه يحمر

حد يشوفلى حل فى الموضوع ده احبس الواد يعنى فى البيت ولا ابقى انزل معاه على شان محدش يعاكسه

مش البنت بردو بتاخد اخوها معاها على شان محدش يعاكسها

انا بصراحه مش عارفه سبب ولا حتى علاج للموضوع ده غير ان احنا

لازم

نراقب الله فى كل تصرفتنا ونعرف بجد ان الله ناظرناً

ساعتها بس معتقدش ان ممكن نسمع اى حاجه من دى

هو دا الحل اللى عندى

فتوى التصوير

انا خريجه فنون جميله عادى لحد هنا

اللى مش عادى انى عندى ابن خالتى دخل نفس الكليه بعدى بكام سنة بس قسم ديكور ولحد دلوقتى مش عارف يخرج دى اللى مش عادى

اصلا كل سنه يسقط فى مادة الرسم.. ليه دا انت بترسم حتى احسن منى

يقولى لا الرسم حرام ..انت عاوزنى اروح النار

نار ايه بس هو انا بقولك ارسم موديل عارى ارسم يا اخى اى حاجه واطلع من الكليه وبعدين ابقى قطع الحاجات دى مش كفايه كسرت كل الصور والتحف اللى فى البيت

هما بردو المسلمين كده

لا بردو الرسم حرام

ويقولى

(عن ابن عباس رضى الله عنه عن رسول الله صلى الله عليه وسلم يقول

ان اشد الناس عذابا ُيوم القيامه المصورين

صحيح البخارى كتاب الباس باب التصوير

شوفتى بقا

طيب هو حدد انهى نوع من التصوير اكيد التصوير الغير نافع

هو انت شايفنى بنعمل اصنام

لا بردو حرام

لحد هنا وكنت تعبت من الحديث معاه ويبدو انه مش ناوى يقتنع

وجرى على المكتبه بتاعتى فى البيت - - اهو بس لاقيته الحمد لله مش راحه النار ان شاء الله

كتاب فتوى التصوير فى الفقه الاسلامى للشبخ محمد الحبشى

وكمان اهو بوست على النت على شان لو كلامى فى حاجه غلط حد يقول

بسم الله والصلاة والسلام على رسول الله فمن يهدى الله فلا مضل له ومن يضلل لن يجعل له ولى مرشدا

الهم ارنا الحق حقا وارزقنا اتباعه وارنا الباطل باطل وارزقنا اجتنابه

الكتاب عبارة عن شرح لكل انواع التصوير وما هو محرم وما هو غير ذلك وفى الاخر جمع للفتوى من بعض الشيوخ

واليكم الفتوى

فتوى الشيخ العلامه محمد متولى الشعراوى

ردا على سوال :ما هو القول فيمن يزينون الحائط برسوم بعض الحيوانات ,وهل هذا ينطبق عليها ما ينطبق على التماثيل البارزة المجسده من تحريم

فكانت الاجابه :لاشى فى ذلك ولكن ما حرم هو ما يفعله البعض من تقديس هذة الحيوانات اما ان كانت ترسم لكى تستعمل فى الزينه فلا مانع فى ذلك .

وفى نص فتوى الشيخ السيد سابق قال

:ان الصور التى لا ظل لها كالنقوش فى الحوائط وعلى الورق والصور التى توجد فى الملابس والسواتر جائزة كلها

ويقول الشيخ احمد محمد جمال :

ان التحريم منصب على المجسمات التامه حيث كانت البدايه لحداثة العهد بالشرك والوثنيه للمصلحه جاز التصوير

لما اصبح اليه من ضرورة فى كثير من العلوم والشئون والمرافق العامه يبقى التحريم فى المجسمات التى تتخذ للتعظيم حتى وقتنا هذا

ويضيف الشيخ محمد عبد الله الخطيب

ان الحرام ما كان له ضل اى مجسم ولا باس فى الصور التى لا ظل لها اذ لم تكن موضع تعظيم

وقد اتفق العلماء على

ان المحرم هو ما كان تمثالا غير ممتهن كامل الجسم له ظل يضاهى خلق الله وما كان غير ذلك فهو حالا ل مطلق

واستسنوا من ذلك لعب الاطفال لانتفاء عله التحريم عنها وهى المضاهاة والتعظيم

والرسم على الممتهنات من الورق والكرتون وما فقد عضو لا يعيش بدونه او مشوة ويجوز تعليق هذة الصور ولكن يكرة ناحيه القبله

ربنا لا تواخذنا ان نسينا او اخطانا

دا انا مدخلتش نحت مخصوصا على شان الموضوع دا مع انى فى النحت احسن من الرسم

ولا .. تعليق

انت رحت اسكندريه قبل كده

اه.. بس كنا راحين نجيب بضاعة................مع مين ....... مع الواد ريكو عارفه

اه انا ..امبارح شفتو ماشى مع البت الرفيعه دى

انهى واحده ..اللى بتقعد عند الميدان عندنا ..

دى صغيير ...... مش رفيعه ..ايوة هى دى
انت يا واد انت وهو شوفة شغلكم هات الناس اللى واقفه دى

الولدين فى وقت واحد

عبود ...عبو د... ترعه ...عبود

دة كان نص حوار سمعته من طفلين لا يتعدى عمرهما السبع سنوات

فى ميكروباص بس ما كنوش راكبين دول كانو شغالين التابعين بتوع الميكروباص مع سواق ربنا ما يوريكم

ولا ......تعليق

تحديث

اللوحه بتاع الولد دا انا اللى رسمها للعلم فقط

معلـــــــــــش

معلـــــــــــــــــش

كلمه تقربا يتعلمها الطفل المصرى مع بدايات الكلام ولا ينسها ابدا

مشهد 1

طفل صغير يكسر اكبر فازة موجوده عندى وبعدين

ايه ده يا كريم فى حد يعمل كده انا زعلانه منك

كريم : خلاص بقا قالك معلش خلاص معلش بس متعملش كده تانى

مشهد 2

طفل يرجع من المدرسه بعد انا اتخانق وضرب اصحابه وبهدل نفسه وتيجى تحاسبه معلش بقا خلا ص المرة دى

مشهد 3

واحد ماشى فى امان الله يوقع عليه زباله من بلكونه واحده فى الشارع

يجى يزعق تقوله :معلش يا اخويا العتب على النظر مشفتكش

مشهد 4

واحده ماشيه وساحبه وراها يجى 6 عيال وحامل فى السادس تسالها ايه دا كلها تقولك

معلش بقا هنعمل ايه العيال احباب الله

مشهد 5

موظف حكومى يعطلك كل شغلك ويبهدل واول ما تروح تشتكى للمدير بتاعه بعد ما تكون جبت واسطه طبعا

يقولك بابتسامه تراها على وجه لاول مرة معلش يا باشا ما انت عارف ضغط الشغل معلش المرة دى

مشهد 6

واحد ه لا بتعرف تسوق ولا نيله وركبه عربيه تخبطك وتيجى تكلمها تقولك :معلش الطريق اصل مش عارف فى ايه

يجى عسكرى المرور

بردو معلش

مشهد 7

واحده حبيبها مطلع عنيها ومبهدله على الاخر تيجى تقولها وليه يا بنتى بتعملى كده فى نفسك وتقولك: معلش بحبه معلش بقا

ومشاهد من دى كتير كل حلولها معلش دا حتى الكلام العادى بقت سبقاه كلمه معلش

مثلا تلاقى اتنين واحد بيطلب حاجه من واحده يقوله معش ملاقيش معاك فكه

ولا لو واحد نفسه يعدى من واحد

تلاقيه بيقول

معلش يا افندم اعدى

وشوف عندك انت ممكن تسمع الكلمه دى وتقولها كام مرة فى اليوم

وكانها الكلمه السحريه لاصلاح كل حاجه ولا هى بتصلح ولا حاجه

اه معلش انا لازم امشى دلوقتى

مستنيا تعلقاتك كام مرة اتعرضت لكلمه معلش وممكن تعمل ايه لما واحد يكون مبهدلك وفى الاخر معلش

لو حد عرف معنى الكلمه الاصلى يقولى يمكن نلاقى حل لمعلش دى ومعلش بقا

العاشرة مساءً

النهاردة عيد ميلاد برنامج العاشرة مساء ً الذى يذاع على قناه دريم كل يوم الساعه عشرة

ومن موقعى هذا قررت انا اعترف بفضل هذا البرنامج

كل علاقتى بالبرنامج مشاهدة وفقط

بس البرنامج دة الوحيد تقربا ً اللى متبعاه

كما انه البرنامج الوحيد اللى ممكن نتكلم عنه فى الشغل وهو تقربا مصدر معرفتى بالاخبار

من غير ما اطول بس انا حبت اقول انه فعلا برنامج هايل واننى من خلاله تعرفت اشياء عمرى ما كنت اتصور انى ممكن اعرفها

يعنى مثلا حلقه د/ فاروق الباز خالتنى احب الجولوجيا

حلقه رجل الاعمال محمد العربى ود/ احمد بهجت حسستنى ان لسه يا ناس فى ناس معاها فلوس بتحب مصر وبتعمل حاجه للبلد و مش بس اللى اتولد فى بقه معلقه دهب هو اللى ممكن يوصل ويكون معاه فلوس وصاحب هدف

واول مرة اسمع وجيه عزيز والشاعر على سلامه وبعدها اتابعهم بردو من خلا ل العاشرة

بس برضو ما انكرش انه برنامج كثيرا ما يصيبنى بالاحباط من كتر مناقشه سلبيات المجتمع

الا انه مع ذلك سيظل ا برنامجى المفضل

مش عاوزة اتكلم كتير بس انا كنت عاوزة اقول كل سنه والبرنامج مستمر

(واشكر كل فريق العمل والمذيعه المتميزة (منى الشاذلى

ونفسى اعرف بقا رايكم ايه فى البرنامج

حلو بجد ذى ما انا شايفه ولا انا بس اللى شايفه كدة

فزورة

فى حد زمان قالى الفزورة دى وانا من ساعتها مش عارفه احلها قلت اسالكم بردو لما نبقى كتير يمكن تتحل

قالى فى ولد صغيير مات

عاوزين نعرف مين اللى يتحاكم على شانه

قلت : طيب مات ازاى

قالى : فى واحد كان واقف فى البلكونه على شان الدنيا حر والنور مقطوع ومفيش مروحه

بيشرب سيجارة خلصت رماها وقعت على منور بيت فى زباله الزباله ولعت البيت كان مبنى اى كلام ولع هو كمان

كان فى واحده ست سايبه ابنها الصغيير لوحده وراحت تجيب حاجات ومش واخده باله منه

ما هى كمان تعبانه وطالع عنيها ومتقدرش تشيلو رايحه جايه واحد حب يتصل بالمطافى لاقى التلفونات مشغوله ولما ردو الطريق زحمه على ما وصلت المطافى كان الولد الصغيير مات فى الحريقه

بس المطلوب انك تقول مين السبب فى موت الطفل

بس سهله مش كده حلوها بقا

اه على فكرة المفروض ان الغلطان واحد بس

كل الاشخاص والعناصر الموجودة والمشار اليها متهمين

انت كام واحد

يقول يونج فى تفسير النظريه النفسيه للابداع الفنى ان الفنان يحمل بداخله شخصيه مزدوجه شخصيه المبدع والشخصيه العاديه وانه عندما يبدع يصبح شخص اخر وانه يعيش فى صراع دائم وعليها ان يضحى بالشخصيه العاديه فى سبيل الشخصيه المبدعه

ايه علاقه الكلام المكلكع دة باللى انا عاوزة اقوله

اقولكم

انى اكتشف ان مش الشخص المبدع او الفنان هو بس اللى عنده شخصيتين

تقربا كل الناس هتقولولى ازاى ....... اقولكم

مشهد 1

رجل يلوح فى وجه ابنه وفى يدة سيجارة يدخنها من حين لاخر ويقول

انت يا ابنى عارف خطورة السجاير ايه اياك يا حماده تقربلها ولا حد من اصحابك يديك سيجارة وتاخدها ولا ينسى ابدا ان ينفس دخان السيجارة فى وجه الابن بعد الانتهاء من الحديث

مشهد 2

ام مع ابنها

انت اتجننت مش عارف ان دة حرام لما واحد صاحبك يديك حاجه اوعى تستعملها لازم تحافظ عليها دى امانه هتدخل النار

بعد ثوانى

ماما عاوزة اصور الورق ده على شان اذاكر منه

خلاص سيبو انا بكرة هعملهولك فى الشغل هى ايه فلوس على الفاضى فى الشغل فى ورق وماكنه تصوير لسه مستلماها فى العهد جديد

! عاوز كام نسخه

مشهد 3

طالبه لاخرى

شفتى امبارح اشتريت ....... وطلع بايظ الناس خلاص مش عارفين ان الغش حرام ومن غشنا فليس منا .

نفس الطالبه بعد الامتحان

الحمد لله غشيت الامتحان كله انا لازم اشكر ربنا على شان اللجنه كانت سهله بعد اذنك انا طلعه الجامع اصلى !!!!!

مشهد 4

ولد لاخته

انت ازاى تفضلى تتكلمى فى التلفون لحد دلوقتى الساعه 12 باليل هو ايه البيت سايب

وسيبى التلفون بقى على شان فى واحده زملتى هتكلمنى الساعه 1؟

ومشاهد من دى كتير اكيد انتم شفتوها وممكن تكون جوانا احنا فى موقف نرفض تماما الشى وموقف اخر نقبله عادى

تفتكرو ليه طب الفنانين ولعنه الفن لبستهم والناس العادين ؟؟؟

لو عندكم تفسير للكلام دا انا فى انتظار تعلقتكم

اهو نشوف على الاقل احنا هنطلع كام شخصيه

مبروك بس ليه كده

هو الحب ممكن يتدارة

بلاش الحب الخطوبه لو انت خاطب او مخطوبه ممكن تعمل نفسك مش واخد بالك

بلاش دى خالص طب لما تتجوز ومتقلش يبقى ايه

بصراحه هى دى كانت كل الاسئله اللى دارت فى ذهنى

حينما علمت بزواج زملتى العزيزة معنا فى الشغل وانه كانت مخطوبه من بضع اشهر ولكنها لم تفصح عن ذلك

حتى بعد الزفاف وقد علمنا جميعا بالصدفه

حد فاهم حاجه لا طبعا ...... افهمكم

احنا فى الشغل شله كده كلنا شباب وبنات تقربا من سن بعض

وتقربا بنفضل مع بعض اكتر من ما بنفضل فى بيوتنا لحد هنا عادى

ولم بيحصل اى حاجه بنقول من باب الزهق الدردشه العشره

والمفروض كمان ان احنا بقنا اصحاب بس يا جماعه

لما يبقى فى معاكم حد وعادى مع بعض وفجاه ياخد اجازة وفجاة برضو بالصدفه الباحته تعرفو انه اتجوز من غير يقول ولا اى حاجه

ولا يعزم حد ولا اى كلام من ده يبقى ايه والله يا جماعه انا بتكلم نفسى الاقى سبب لان مش هاين عليا العيش والملح

ولا انا كده غلط وان البنوته من حقها عادى متقولش

فى حد يا جماعه يفضل مخطوب 6 اشهر ويتجوز وميقولش

حد بس يقولى سبب دا احنا حتى كنا فرحنالها دى حتى لاعندها اخوات ولا اصحاب غيرنا

افتونى يا جماعه ولو انا غلطانه وانه من حقها متقولش قولولى برضو

الست مبروكة

لسبب دراسى بحت قررت انى اروح عند العرافه دى على شان اعمل معاها موضوع عن المعتقادات والحاجات دى

المهم انى رحت هناك واول ما دخلت لاقيت بيتها غريب قوى و مش نظيف وكئيب شويا

سالتنى انا واللى معايا ها عاوزين ايه

ولا حاجه يا ست مبروكه سلامتك.. طبعا مقولكوش انا كنت خايفه ازاى وقرات كل القران اللى حفظاه تقرباً من اول الطريق ولحد ما وصلت وانا قاعده معاه

الغريب بقا ان الست دى

قالتى كلام غريب قوى وقالتلى حاجات حصلت بجد ....انا بصراحه مش عاوزه اصدق و بردو عارفه ان الكلام ده حرام بس بصراحه كنت مستغربه موت من كلامه اومش عارفه بس بردو مقدرش انكر انى اكيد فضلت افكر فى كلامها

كل اللى عاوزه اقولى بس هو ايه اللى بيخلى الناس تبحث عن الغيب

بيدورة فى على ايه .. يا جماعه اوعى حد يروح لعرافه حرام جدا وبتخوف جدا جدا بالرغم من انها كانت معانا لطيفه قوى وجاوبت على كل حاجه كنا عاوزنها وكمان معترضتش على تصورها

يالا اهى تجربه جديده الواحد عاشها وخلاص

تحديث

يا جماعه انا لما سالت الست مبروكه انتى بتعرفى الحاجات دى ازاى

قالتلى انها مصاحبها (بسم الله الرحمن الرحيم )عفريته بتجالها وهى اللى بتقولها على كل الحاجات دى

ودى ممكن فى حاله واحده للحاجات اللى هى حاصله فعلا

يعنى مش غيب

انما الغيب لا يعلمه الا الله

والله اعلم الحمد لله انى طلعت من عندها سليمه انا كان قلبى هيقف

جمعيه محبى الموت

الموضوع باختصار شديد

ان فى حاجه اسمها جمعيه محبى الموت انا عن نفسى اول مرة اعرف الحكايه دى

اسس هذة الجماعه كما يقال مجموعه من الشباب العربى فى اليابان وانهم ينتشرون حول النت

الجمعيه دى تدعو الشباب للتخلص من من الحياة , لان الحياة التى نعشها - على حد قولهم (حياه زائفه ) والحياه الحقيقيه توجد فى العالم الاخر

وتستهدف هذة الجماعه الشباب المصرى خاصه لانها لا تجد له سبيل للراحه سوى الموت فى ظل ما يعانيه فى الحياه اليوميه من فقر وبطاله وتاخر فى سن الزواج ....الخ

ومن اهم الاسباب التى تستخدمها هذة الجماعه لاجتذاب الشباب نحوها الفقر والازمات العاطفيه وحاجات تانيه كتيركل الازمات حلها الموت عندهم

المهم ان عدد ضحايا الجماعه دى وصل فى 3سنوات 1200 شخص

انا لحد دلوقتى مش قدرة اصدق ولا افهم ايه الحكايه بالظبت

كل اللى انا عارفه انى قرات الكلام ده فى كذا جريده منهم المصرى اليوم وكمان عملت بحث على النت لاقيت الكلام بجد

بس فى الاخر عاوزه اسال

هو فعلا فى الحاجه اللى ممكن ما هما كانت تخلى بنى ادم يتخلص من حياته

الرد لكم

الصالون

الصالون فى لغه الفن يعنى المعرض الذى يجمع عدد كبيرمن الاعمال الفنيه لمجموعه من الفنانين وفى جوائز ومقتنيات وكده يعنى

المهم انى انا ليه حكايات مع الصالونات اللى فشلت فشل ملاوش حل فى انى ادخل باعمالى العاديه فيها

رسمه الولد دى تقربا دى مستوى رسمى الطبيعى ممكن فوق شويا تحت شويا بس دى هو متوسط شغلى واللى المفروض انى الناس عادى تفهمه واللى ان بحب ارسمة

اما الرسمة التانيه دى لو اعتبرناها رسم وانا اللى عملها بردو

هى دى شكل الاعمال اللى ممكن تتقبل فى الصالونات

والرسمه دى واخواتها هم اللى اتعرضم فى معارض مع ان انا نفسى مش فاهمة ايه ده غير انى كنت بجرب اعمل تكوين عادى يعنى مش رسم وطلع كده

بس خلاص التعليق للقراء

رجاء

لو حد عرف يسمى الرسمه التانيه دى اسم يقولى على شان كل ما حد يسالنى معرفش اجاوب

انا والخلفيه

انا وخلفيات الرسوم المتحركه عملت فى مجال الرسوم المتحركة لفترة لا باس بها الا اننى من كثره عملى فى هذا المجال وجدت اننى أصبحت أشبه الرسوم المتحركه

واليك القصه بالتفصيل

فى هذا المجال يتم رسم الشخصيه وتحركها فى المكان ويتم وضع خلفيه لها وتسحب الخلفيه من وراء الشخصيه وفتبدو وكانة الشخصيه هى التى تتحرك (دا طبعا بالختصار شديد) والاماكن والاحداث تتابع عليها

دا اسلوب من عده اساليب لتحريك الكرتون

كل ده مش مهم المهم

انى بعد شويا من شغلى فى الكرتون بقيت عمله كدة انا فى مكان وكل الاحداث والحاجات حتى الشخصيات تتابع وتمر من حولى لا وايه كمان فى فرق توقيت التوقت دا موضوع كبير مش وقته دلوقتى

باختصار انه مش كفايه انا كده لا دا كمان بقابل ناس احس انى المفروض كنت اقابلهم من زمان وحاجات بتحصل احس انه مش وقتها دلوقتى مش بقولكم فرق توقيت

و كل ما اقول لحد فى المجال معايا كده اكتشف انه نفس الحكايه ممكن دا تكون لعنه الفن علينا

احسن حاجه انى سبت الرسوم وشغاله دلوقتى دعايه واعلان

بس يا رب بعد شويا مبقاش عامله ذى الاعلانات والافشات اللى الناس بتتفرج عليه كل يوم فى الشارع

ناجى كامل

الفنان ناجى كامل

ذلك الرجل الرائع فنيا الاكثر من رائع اب واستاذ لكل من حوله الا انه لم يكن لى استاذ وفقط بل كان كان فعلا قدوة فنيا كلما رايته يرسم تمنيت ان اصبح مثله ولكن حقا ما لم اقدر على ان اكتسبه منه تلك الطيبه الخالصه والتسامح الرائع حتى انه يتسامح مع من يكرهونه وهذا ما كان يدهشنى فيه ناجى كامل فنان محترف منذ اكثر من نصف قرن نصف قرن من الابداع الفنى

ولكنة لم يعرف الا كرسام كاركاتير عمل فى اكبر الصحف القوميه عاش مع عمالقه الفن فهو نفس جيل جاهين وحجازى ورجائى ونيس ومصطفى حسين الا انه الاقل شهرة ليس لشى الا لانه لا يعشق الشهرة انه فنان وفقط لا يهمه من سيعرفه اكثر من ان فنه ورسالته تصل للناس انه احد المصابين بلعنه الفن لقد جعله الفن ينسى كل شى الا انه فنان يقضى الساعات امام لوحاته واعماله الفنيه ولا يفرحه شى اكثر من ولادة عمل فنى جديد او فنان على يده فهو يعطى فنه لكل من حوله استاذ ناجى ليس رسام كاركاتير وفقط فهو اولا نحات عبقرى ورسام رائع

الا ان فن الكاركاتير اخد منه اكثر من ما اعطى له ولكن تبقى اعماله العظيمه تتحدث نيابه عنه يكفى منها واجه روز اليوسف واعماله المنتشره فى كل مكان وان لم يكن احد يعرفها

استاذ ناجى ربنا يشفيك وترجع تنور مكتبك فى الجرنال تانى على شان انت وحشتنى بجد

الصوره دى اكتر صوره انا بحبها حطتها فى مكتبه فى الاهرام على شان كدة هى دة اللى عرضتها من اعماله واللى عاوز يشوف باقى اعماله يدخل على موقع القطاع ويكتب ناجى كامل او يبقى يبص قى جرنال الاهرام يوم السبت او الاحد او الاربع فى صفحه 10 او15وبس

موقع قطاع الفنون التشكلية

www.fineart.gov.eg

متحف الفن الحديث

الصور دى من متحف الفن الحديث تعبر عن العبقريه فى العرض

لانهم واضح جدا (انهم ابتكرو طريقه جديدة للعرض) محصلتش ولا عمرها ممكن تحصل فى اى متحف الا عندنا

بدون تعليق الظاهر ان مكنش فى اى مكان فى يتحط فية (بطاقه بيانات العمل الفنى الا فوق العمل الفنى )بس شوفو المكان

عبقريه لما كان مركب ركبو البطاقه مع الناس على شان الميا يمكن

بس الست الغلبانه دى هى ناقصه على شان يشيلوها البطاقه فوق ضهرها

بس برضو الواحد ينكرش ان المتحف فعلا رائع باعمال عظماء الفنانين فى مصر وانه بالفعل يستحق المشاهدة دا لو حد ليه فى الفن يعنى ولو ملوش مش مهم اهو برضو ياخد فكرة

المتحف فى الاوبرة قدام المسرح الصغير لو حد حب يروح